«Ալտերնատիվ էներգիա» ընկերությունը մտադիր է ՀՀ Կոտայքի մարզում 5 հա ջերմոցային տնտեսություն հիմնել: Ներդրումների ընդհանուր ծավալը գնահատվում է 2 մլրդ դրամից ավելի: Բոլոր սարքավորումները պետք է ներկրվեն Հոլանդիայից; Ընկերությունը դիմել է ՀՀ կառավարությանը՝ ներկրվող սարքավորումների համար 3 տարով հետաձգել ավելացված արժեքի հարկի վճարումը:
Կառավարության թույլտվությունը, ամենայն հավանականությամբ, կտրվի հունիսի 4-ի նիստում:
Հատկանշական է, որ պետեկամուտների կոմիտեն ուշադրություն է հրավիրել այն փաստի վրա, որ սույն ընկերությունը նոր է ստեղծվել, չունի հարկային պատմություն, ու ընդհանրապես՝ չկա որեւէ փաստաթուղթ, որով հնարավոր կլիներ տեղեկություն ստանալ ընկերության գործունեության վերաբերյալ:
Այնուամենայնիվ՝ ՀՀ էկոնոմիկայի նախարարությունը պաշտպանել է «Ալտերնատիվ էներգիա» ընկերությանը՝ նշելով, որ արտոնություն տրամադրելու համար հարկային պատմություն չի պահանջվում: